Пентагон денеска накратко беше затворен, а делови од зградата беа евакуирани откако сензорскиот систем сигнализираше можна присутност на опасни материи. Подоцна било утврдено дека станува збор за лажна тревога предизвикана од дефект на системот, потврдија извори запознаени со случајот.
Според информациите на Си-ен-ен, евакуацијата била активирана откако сензорите регистрирале можна појава на антракс, што било споменато и во комуникацијата на службите за итни интервенции. Сепак, еден од изворите појаснил дека системот бил во дефект, поради што бил активиран лажниот аларм.
Портпаролот на Пентагон, Шон Парнел, изјави дека системите откриле „проблем со квалитетот на воздухот што бара мерки на претпазливост додека не се утврди неговото значење“.
„Министерството ги спроведува стандардните заштитни протоколи, вклучително и наредбата вработените во погодената област да останат на своите работни места. Интервентните тимови се на терен и се подготвени да им помогнат на вработените“, изјави Парнел.
Во интерното известување испратено до персоналот било наведено дека се потребни дополнителни тестирања, кои можеле да траат од еден до два часа, а вработените биле повикани да не извлекуваат брзи заклучоци поради засиленото присуство на безбедносни служби.
Во акцијата учествувале тимот за опасни материи на Агенцијата за заштита на силите на Пентагон и противпожарната служба од округот Арлингтон. Според изворите, биле затворени повеќе катови и ходници во комплексот, а полицијата интервенирала со гас-маски и целосна хемиска заштитна опрема.
И покрај драматичните сцени, надлежните потврдија дека не е утврдена реална опасност и дека станувало збор за лажна тревога.
