Пензионерите без картички од Алта банка ќе може да подигнат до 20.000 денари на шалтер

Народната банка подготвува посебен начин за исплата на пензиите на околу 3.500 пензионери кои примаат пензија преку АЛТА банка АД Битола, но немаат платежни картички. Се разгледува можноста тие еднократно, преку шалтер, да подигнат до 20.000 денари, со што би се избегнале повеќекратни посети на банката.

Ова го соопшти гувернерот на Народната банка, Трајко Славески, во интервју за „Топ тема“ на ТВ „Телма“. Од вкупно 11.500 пензионери кои примаат пензија преку банката, околу 3.500 немаат платежни картички. Деталите за начинот на исплата ќе бидат објавени откако ќе се утврдат сите услови.

— реклама —

Народната банка, покрај решенијата за пензионерите, разгледува и можности за компаниите кои имаат средства на сметки во банката, а треба да исплатат плати и да ги подмират обврските за даноци и придонеси до законскиот рок, односно до 15-ти во месецот.

— реклама —

Според воведените мерки, правните лица можат да вршат внатрешни плаќања во рамките на АЛТА банка, без ограничување на износот, додека преносите на средства кон други банки се привремено ограничени.

Славески посочи дека Народната банка навремено вовела привремена администрација во банката, како заштитна мерка со времетраење до три месеци. Тим на Народната банка е присутен во банката и континуирано ја следи состојбата и функционирањето на банкарските услуги, вклучително и на банкоматите.

— реклама —

Во меѓувреме, Народната банка испратила известување до надлежниот регулатор во Србија, со барање во рок од три дена да се произнесе дали АЛТА банка а.д. Белград ќе ги понуди на продажба акциите во АЛТА банка АД Битола.

— реклама —

Гувернерот најави дека, без оглед дали ќе добие одговор од српскиот регулатор, по истекот на десет дена Народната банка ќе ги понуди акциите на Македонската берза. Според него, постои интерес од неколку потенцијални инвеститори од земјата и од странство. Евентуалната продажба ќе се спроведе согласно законските и супервизорските критериуми, со цел да се обезбеди соодветен инвеститор и долгорочна стабилност на банката.

Славески нагласи дека постапката треба да се одвива во кратки рокови, а Народната банка ќе продолжи да ја следи состојбата и да презема мерки во рамките на своите законски надлежности, со цел заштита на клиентите и стабилност на банкарскиот систем.