„Банкоматите се празни, експозитурите затворени“ – СДСМ бара оставка од Славески поради Алта банка

СДСМ денеска излезе меѓу граѓаните во Битола, обвинувајќи дека по случувањата со Алта банка АД Битола дел од штедачите и пензионерите се соочуваат со сериозни проблеми при пристапот до своите пари. Од опозициската партија тврдат дека експозитурите се затворени, дел од банкоматите се празни, а граѓаните кои немаат платежни картички не можат да ги подигнат средствата.

„Денеска е тежок ден за граѓаните на Битола, овде сме заедно со нив, луѓето имаат мака, огромен проблем по избивање на скандалот со Алта банка“, соопштија од СДСМ.

Според партијата, граѓаните се загрижени за своите заштеди и финансиската сигурност, особено пензионерите на кои пензијата им е единствен извор на приходи.

— реклама —

„Сметки, струја, греење, храна, лекови. Пензионерите, еве го втори е, остануваат без пензии. Експозитутрите се затворени, банкоматите се празни, нема картички“, наведуваат од СДСМ.

Од партијата тврдат дека ограничувањето на одливот на средства до 10.000 денари неделно дополнително ја отежнува состојбата, бидејќи дел од граѓаните, според нив, немаат практична можност да го искористат ниту дозволениот износ.

„Ниту тие 10 илјади немаат како да ги извадат. Луѓе без картички не можат да стигнат до своите пари бидејќи експозитурите не работат. Многу банкомати се празни, а на другите се чекаат редови со часови“, тврдат од СДСМ.

— реклама —

Опозициската партија упати сериозни обвинувања кон премиерот Христијан Мицкоски и гувернерот на Народната банка, Трајко Славески, тврдејќи дека институциите не ги заштитиле интересите на граѓаните.

„Арамиите направија хаос и сега наместо за граѓаните, нормално го штитат криминалниот капитал“, се наведува во партиската реакција.

Од СДСМ повторија дека пред 11 месеци предупредувале за ризиците поврзани со влегувањето на српскиот капитал во македонскиот банкарски сектор. Тие тврдат дека актуелната состојба е последица на одлуки за кои мора да се утврди политичка и институционална одговорност.

Партијата бара да се овозможи целосно подигнување на заштедите на граѓаните, наместо ограничен пристап до средствата.

— реклама —

„Ако се сака да се заштитат штедачите, треба да им се дозволи да си ги подигнат своите заштеди во целост. Но оваа криминална власт има за цел да го заштити капиталот на криминалците, на сметка на граѓаните чии депозити се заробени“, обвинуваат од СДСМ.

Покрај барањето за истрага, од партијата побараа и оставка од гувернерот Славески.

„Мора да има истрага и мора да има одговорност, и од Мицкоски и од Трајко Славески. Прв чекор кон решавање на овој скандал е Славески да даде оставка, да се отвори истрага“, порачуваат од СДСМ.

— реклама —

Дополнително, бараат Фондот за пензиско и инвалидско осигурување да не ги исплаќа идните пензии на сметки во Алта банка, со образложение дека така би се заштитиле пензионерите.

Народната банка претходно соопшти дека Алта банка АД Битола е ликвидна и високо капитализирана, а привремената администрација е воведена како заштитна мерка по одземањето на дозволата на нејзиниот акционер во Србија.

Од владејачката ВМРО-ДПМНЕ, пак, претходно порачаа дека пензиите на околу 11.000 пензионери со сметки во банката биле исплатени уште во петокот и дека ќе бидат обезбедени посебни шалтери за оние кои немаат платежни картички.