До 7:30 часот утрово во Македонија се регистрирани 37 пожари на отворен простор, од кои пет се активни, еден е ставен под контрола, а 31 се целосно изгаснати, информира Центарот за управување со кризи.
Најсериозна е состојбата во Прилепско, каде активен е пожарот кај селото Чаниште, со краци кон Крушевица и Лопатица, кон Црна Река и кон битолското село Орле. Активни пожари има и во Студеничани, Македонски Брод, Кичево и Могила.
Во Студеничани гори мешана шума на потегот Моране – Вртекица – Рамни Габер, додека кај Македонски Брод огнот зафатил ниска вегетација, нискостеблеста шума и грмушки на повеќе локации. Во Кичево активен е пожарот кај Тајмиште, во месноста Дарда, каде гори високостеблеста букова шума. Пожар е активен и кај селото Мојно во Општина Могила.
Под контрола е ставен пожарот на депонијата во Делчево.
Во текот на изминатото деноноќие се изгаснати 31 пожар на отворен простор во повеќе општини низ земјата, меѓу кои Сарај, Битола, Струмица, Велес, Охрид, Дебрца, Гевгелија, Кичево, Јегуновце, Тетово, Теарце, Гостивар, Куманово, Липково, Желино, Кочани, Струга, Зелениково, Арачиново и Крушево.
ЦУК продолжува да ја следи состојбата на терен и апелира до граѓаните на внимателност поради високата опасност од ширење пожари на отворен простор.
