Пет активни пожари во земјава, огнот зафати шуми, пасишта и насади

Во Македонија до 13 часот денеска се регистрирани вкупно 14 пожари на отворен простор, од кои пет се сè уште активни, три се ставени под контрола, а шест се целосно изгаснати, информира Центарот за управување со кризи (ЦУК).

— реклама —

Најсериозна е состојбата на подрачјата на Студеничани и Зелениково, каде пожарот се движи од селото Моране преку Вртекица и Рамни Габер, со крак кон Палиград, како и над селото Вражале. Огнот зафаќа мешана шума.

Активен пожар има и на подрачјето меѓу општините Гостивар и Македонски Брод. Пожарот започнал кај селото Трново во Гостиварско и се шири кон селата Битово, Заград и Страјане во Општина Македонски Брод, при што гори нискостеблеста шума, ниска вегетација, пасишта и папрат.

— реклама —

Во Општина Росоман пожарот кај селото Манастирец зафатил лозови и овошни насади, додека во Општина Зелениково, кај селото Тисовица, гори мешана шума и ниска вегетација. Активен е и пожарот над селото Нежилово во Општина Чашка, на местото Сватови, каде што гори ниска вегетација и смреки.

— реклама —

Под контрола се ставени три пожари. Во Општина Кичево, кај селото Тајмиште и месноста Дарда, гори високостеблеста букова шума. Пожар е регистриран и на градската депонија „Мелци“ во Кавадарци, како и на депонијата во Делчево, каде што гори отпад.

Шест пожари се изгаснати. Такви случаи се регистрирани кај селото Желино, во селото Одри во Општина Теарце, меѓу резерватот „Јасен“ и селото Брезница, кај селото Зајас во Кичево, кај селото Ветрен во Делчево и кај селото Виничани во Општина Градско.

— реклама —

ЦУК продолжува да ја следи состојбата со пожарите на отворен простор и да ги координира активностите на надлежните служби.