Центарот за управување со кризи (ЦУК) денеска до 13 часот регистрирал вкупно 13 пожари на отворен простор, од кои пет се активни, три се под контрола, а пет се целосно изгаснати.
Активни пожари има во општините Студеничани и Зелениково, каде огнот зафаќа мешана шума на потегот од Моране, преку Вртекица и Рамни Габер, до кракот кон Палиград, како и над Вражале и Тисовица.
Пожар е активен и во селото Копаница, Општина Сарај, каде гори мешана шума. Во Општина Струга пожарот кај селото Ливада зафаќа ниска вегетација и стрниште, додека над селото Нежилово во Општина Чашка гори ниска вегетација и смреки.
Активен пожар е регистриран и кај православните гробишта во Тетово, каде се зафатени ниска вегетација и шума.
Под контрола се пожарите во селото Трново, Општина Гостивар, со ширење кон Битово, Заград и Страјане во Општина Македонски Брод, потоа пожарот на депонијата во Делчево и пожарот кај селото Куклиш во Струмица, исто така на депонија.
Во текот на денот се изгаснати пет пожари – кај селото Франгово во Струга, во буковата шума кај Тајмиште во Кичево, на депонијата во Кутретино во Демир Хисар, меѓу Неготино и Кавадарци и кај селото Стрмница во Брвеница.
ЦУК продолжува да ја следи состојбата на терен и апелира до граѓаните да бидат особено внимателни и навремено да пријавуваат пожари на отворен простор.
