Во текот на денешниот ден во Македонија се регистрирани 12 пожари на отворен простор, од кои пет и натаму се активни, еден е ставен под контрола, а шест се целосно изгаснати, информира Центарот за управување со кризи.
До 13 часот активни се пожарите во општина Студеничани, каде што огнот зафатил подрачје од Моране преку Вртекица до Рамни Габер и гори мешана шума.
Пожар има и во општина Македонски Брод, на месноста Видуш, во близина на селата Драгов Дол и Локвица, каде што гори ниска вегетација, нискостеблеста шума и грмушки.
Активен е и пожарот на подрачјето на општините Јегуновце и Сарај, кој ги зафатил селата Копанце и Туденце и се шири кон селото Бојане. Гори мешана шума.
Во прилепско активно се гаси пожарот кај селото Чаниште, каде што е зафатена ниска вегетација.
Најсериозна е состојбата во подрачјето на Старо Нагоричане, каде што пожарот ги зафатил селата Орах, Диманце и Руганце. Станува збор за шумски пожар при кој е зафатена и една куќа.
Пожарот во Делчево, на депонијата, е ставен под контрола.
Во меѓувреме, шест пожари се изгаснати. Тоа се пожарите кај Милетино во општина Брвеница, кај Железница во општина Кратово, каде што горела депонија, и кај Ветуница во општина Ранковце.
Изгаснат е и пожарот на подрачјето меѓу Велес и Зелениково, кај селото С’лп и месноста Горно Село, кој се проширил кон Карабуниште и Бузалково, како и кон селата Добрино и Тисовица. Во пожарот била зафатена ниска вегетација, дабова и габерова шума, како и квалитетна дабова шума.
Целосно изгаснати се и пожарите кај Батинци во општина Студеничани и кај Палиград во општина Зелениково, каде што гореле ниска вегетација и шума.
