Петгодишно момче почина откако врз него падна голем видеоекран во училиште во Флорида

Петгодишно момче почина откако врз него падна голем видеоекран во основно училиште во Палм Беј, Флорида. Несреќата се случила во училиштето „Ривиера“, а детето, и покрај брзата реакција на училишниот персонал и итните служби, подоцна им подлегнало на повредите во болница.

— реклама —

Полицијата потврди дека вработените веднаш повикале итна медицинска помош и започнале да му помагаат на детето до пристигнувањето на медицинските екипи. Семејството го идентификувало момчето како Белами Докинс-Морис.

Заменик-началникот на полицијата во Палм Беј, Ник Шчепански, изјави дека првичните информации укажуваат на трагична несреќа, но дека истрагата продолжува. Во неа учествуваат истражители од одделите за тешки кривични дела и посебни жртви, како и форензичари.

— реклама —

Полицијата и училишниот округ Бревард засега не соопштија како точно дошло до падот на екранот. Според семејството, ним им било кажано дека Белами го нишал екранот пред конструкцијата да се преврти врз него. Поради тоа, роднините поставуваат прашања дали екранот бил соодветно обезбеден и дали детето било под надзор.

— реклама —

„Очекувавме дека ќе биде безбеден во училиштето, а тој не ни се врати“, изјавила тетката на момчето, Миријам Родригез, додавајќи дека семејството бара одговори.

Управителот на училишниот округ, Марк Рендел, денот го опишал како исклучително тежок за целата училишна заедница. Тој изразил сочувство до семејството и им се заблагодарил на итните служби и медицинскиот персонал за брзата реакција и напорите да го спасат детето.

— реклама —

Рендел посочи дека приоритет во следниот период ќе биде обезбедување поддршка за учениците, наставниците и останатите членови на училишната заедница по трагичниот настан.