(🔴ВО ЖИВО) Петров: Филипче е некомпетентен, а искуството на Црвенковски може да помогне

Андреј Петров, гостувајќи во поткастот „Претрес со Ландов“, изјави дека Венко Филипче не го поистоветува со СДСМ, оценувајќи дека тој е некомпетентен за функцијата претседател на партијата. Петров нагласи дека не сака да зборува лошо за Филипче како човек, туку дека критиката се однесува на неговата способност да ја води партијата.

Тој откри дека иницијативата за платформата 12.5 започнала преку директни разговори со Игор Ивановски уште во ноември минатата година. Во гостувањето во поткастот „Претрес со Ландов“, тој посочи дека во процесот подоцна се вклучиле и други членови на партијата, меѓу кои Гордан Ѓоргиев и Славјанка Петровска.

— реклама —

„Претрес“ на Андреј Петров: Го менуваат Филипче, го враќаат Бранко? А Македонија? Гледај на LANDOV.MK Во живо

Петров нагласи дека поранешниот лидер на СДСМ, Бранко Црвенковски, не бил информиран за иницијативата, ниту пак од него барале помош или поддршка.

— реклама —

„Црвенковски ниту го информираме за тоа, ниту имаме намера од него да бараме нешто. Нормално, тоа е политички писмен човек и гледа што се случува“, изјави Петров.

Тој потврди дека пред неколку месеци случајно се сретнал со Црвенковски на прослава кај заеднички пријател, но тврди дека средбата била кратка и дека не разговарале за политика.

„Тоа беше куртоазен муабет од нога. Како сте? Добри ли сте? Воопшто не разговаравме за политика“, рече Петров, додавајќи дека за тоа можат да потврдат и други присутни на прославата.

— реклама —

Осврнувајќи се на улогата на Бранко Црвенковски во СДСМ, Петров рече дека не може да се негира неговото политичко искуство, со оглед на тоа што бил долгогодишен претседател на партијата, премиер и претседател на државата.

Сепак, тој оцени дека политиката мора да оди напред и дека не треба целата одговорност за погрешните политики постојано да му се припишува на Црвенковски, кој со години не е активно присутен во партиското раководство.

На прашањето дали Црвенковски би можел да помогне со совети, тој одговори дека искуството на поранешните функционери може да биде корисно за партијата.

„Ако ме прашате дали и тој е потребен со свои совети да помогне — и тој, и многу други луѓе кои биле претседатели, генерални секретари или потпретседатели на партијата“, рече Петров.