(🔴ВО ЖИВО) Петров: Повлекувањето на Филипче подразбира повлекување на целосното раководство

Поранешниот член на СДСМ, Андреј Петров, упати критики кон актуелното раководство на партијата, обвинувајќи го за несоодветна политичка реторика, погрешни кадровски одлуки и пропуштени можности на последните локални избори.

Во гостувањето во поткастот „Претрес со Ландов“, Петров оцени дека вербалните напади и навредите кон политичките противници немаат смисла доколку, истовремено, со конкретните политички потези им се олеснува патот до победа.

„Што вреди тоа што ќе го наречете бандит човекот, кога вие реално му вршите работа да заврши работа?“, рече Петров, коментирајќи ги изборните резултати и одлуките на СДСМ за кандидатите на локалните избори.

— реклама —

„Претрес“ на Андреј Петров: Го менуваат Филипче, го враќаат Бранко? А Македонија? Гледај на LANDOV.MK Во живо

Тој посочи дека, според него, со изборот на кандидати за кои се знаело дека имаат мали шанси за победа, партијата практично им ги препуштила Карпош, Куманово, Струмица и Скопје на политичките противници.

Петров ја критикуваше и реториката на актуелното раководство на СДСМ, оценувајќи дека во последните шест месеци таа станала непристојна и несоодветна за политичка комуникација.

— реклама —

„Ние треба да ги воспитуваме младите генерации како да бидат културни луѓе, како да гледаат напред“, рече тој, додавајќи дека не е прифатливо политичарите прво да упатуваат навреди, а потоа да се извинуваат со образложение дека зборовите им се „излетале“.

Говорејќи за иднината на партијата, Петров оцени дека евентуалното повлекување на Венко Филипче од претседателската функција треба да подразбира промени и во поширокото раководство.

„Повлекувањето на Филипче подразбира повлекување на целосното раководство. Не може вие да го смените претседателот, а да останат тие што се со него најблиски соработници“, истакна Петров.

Посебно внимание Петров посвети на изборот на кандидат за градоначалник на Скопје. Тој откри дека разговарал со актуелниот градоначалник на Центар, Горан Герасимовски, кому му давал совети, но и дека се обидел да му помогне на Мишко Ралев, за кого тврди дека претходно добил ветување дека ќе биде кандидат за градоначалник на Скопје.

— реклама —

„Човекот дозна од телевизии, од вести, дека не е кандидат“, рече Петров, осврнувајќи се на Ралев.

Тој оцени дека СДСМ направила погрешен избор со кандидатот за главниот град, посочувајќи дека анкетите, според него, покажувале значителни разлики во рејтингот на потенцијалните кандидати.

„Имате кандидати кои имаат 11, 12 проценти рејтинг, и вие да го изберете тој со два. Освен ако не работите директно во служба на противкандидатот, односно на спротивниот табор“, изјави Петров.

На прашањето дали Мишко Ралев можел да ги победи Амар Мециновиќ и Орце Ѓорѓиевски, Петров не тврдеше дека сигурно ќе победел, но оцени дека Ралев ќе бил многу подобар кандидат и дека СДСМ имала реална можност да влезе во вториот круг.

„Искрено мислам дека ќе направеше многу подобар кандидат и дека СДСМ ќе влезеше во вториот круг“, рече Петров.

Тој заклучи дека за СДСМ не е исто дали ќе биде втора или петта партија по сила во Скопје, алудирајќи на последиците од изборните одлуки и потребата од сериозни промени во партијата.