Петти ден протести во Албанија, демонстрантите се судрија со полицијата

Студентските и средношколските протести против владата на Албанија влегоа во петтиот ден, по неколку вечери исполнети со тензии, судири со полицијата, оштетување имот и апсења.

— реклама —

Студентите по медицина се собраа во близина на факултетот, а потоа се упатија кон Министерството за образование. Неколку маскирани лица ја урнаа оградата, а демонстрантите фрлаа јајца и камења кон полицијата, која возврати со солзавец. Во дворот на Министерството бил фрлен запален куфер, како симбол на иселувањето.

— реклама —

Засилени полициски сили се распоредени во близина на канцеларијата на албанскиот премиер, Еди Рама. Тој изјави дека владата ќе го почитува правото на младите да протестираат, но нема да дозволи насилство и уништување. За протестите ја обвини опозицијата, а спомена и наводно мешање на странски фактори.

— реклама —

Полицијата соопшти дека во Тирана уапсила 10 лица, а против уште 22 се поведени кривични постапки по протестите во петокот. Уапсените се на возраст од 18 до 37 години и се осомничени за учество во насилствата.

Протестите се проширија и во други албански градови, меѓу кои Елбасан, Скадар, Валона, Грамш, Камза, Лачи и Бурел. Во Лежа е пријавена штета на прозорците на средно училиште, додека во Елбасан биле запалени канти за отпадоци. Министерството за здравство соопшти дека по протестите на 16 октомври, медицинска помош побарале 25 лица, меѓу кои и осум полицајци.