Двајца полицајци од Втората полициска станица во Сплит рано утринава спасија 23-годишен државјанин на Холандија, кој се давел во морето кај Траектното пристаниште во Сплит.
Според хрватската полиција, дојавата била примена неколку минути по 4:30 часот, кога било пријавено дека во морето, од надворешната страна на еден од пристанишните докови, има маж кој повикува помош и се држи за бродски синџир.
По пристигнувањето на местото, еден од полицајците ја соблекол униформата и скокнал во морето, каде што го фатил младиот човек кој плутал на површината. Набргу потоа, во водата влегол и негов колега, по што двајцата успеале да го извлечат до железните скали на пристанишниот ѕид. Со помош на трет полицаец, кој останал на копното, младиот човек бил извлечен од морето.
На местото пристигнала Итната медицинска помош. Спасениот бил дезориентиран, премрзнат и под видливо дејство на алкохол. Бидејќи немал документи, полицајците првично не можеле да го утврдат неговиот идентитет.
Додека траела спасувачката акција, во полициската станица се јавил негов пријател, кој на англиски јазик пријавил дека исчезнал 23-годишен турист со кого претходно бил на плажата Бачвице. По описот, полицијата утврдила дека станува збор за лицето кое било спасено и ги упатила неговите пријатели во болницата.
Во болницата било потврдено дека станува збор за 23-годишен холандски државјанин, кој бил задржан на понатамошно набљудување.
Според информациите од полицијата, младиот турист во алкохолизирана состојба влегол во морето затоа што му изгледало забавно и авантуристички, но инцидентот можел да заврши трагично.
