Од ВМРО-ДПМНЕ преку соопштение упатија остри критики кон лидерот на СДСМ, Венко Филипче, обвинувајќи го дека е „главен лобист за прифаќање на бугарскиот ултиматум“.
Во соопштението партијата наведува дека, според нив, СДСМ и Филипче водат „сервилна и поданичка политика кон туѓи интереси“, продолжувајќи ја политиката на поранешните премиери Зоран Заев и Димитар Ковачевски.
Од ВМРО-ДПМНЕ тврдат дека Филипче ги поддржува ставовите на официјална Бугарија во однос на уставните измени и евроинтегративниот процес на земјата.
Во реакцијата се посочува и дека бугарскиот претседател Румен Радев, според ВМРО-ДПМНЕ, јавно најавувал дека по евентуалните уставни измени ќе следуваат и нови барања кон Македонија.
Партијата оценува дека уставните измени не треба да се спроведуваат без јасни гаранции и обвинува дека СДСМ се обидува преку такви политики повторно да дојде на власт.
„Со предавства и антидржавна политика не се доаѓа на власт, туку со гласот на граѓаните и победа на избори“, стои во соопштението на ВМРО-ДПМНЕ.
