Пратеникот на Левица, Амар Мециновиќ, оцени дека процесот за донесување нов Изборен законик е блокиран затоа што, според него, власта се обидува да наметне сопствени решенија наместо да изгради широк политички консензус за изборните реформи.
Во гостување на Канал 5 телевизија, Мециновиќ изјави дека уште при гласањето за потребата од носење нов Изборен законик било јасно дека власта настојува да донесе закон што ќе ѝ одговара.
„Поразително е што по две години власт нема капацитет за комуникација со опозицијата, туку единствена цел е да се концентрира што повеќе моќ“, рече тој.
Според Мециновиќ, воведувањето една изборна единица било едно од претходните ветувања на ВМРО-ДПМНЕ и токму поради тоа започнале разговорите за изборните измени.
Тој тврди дека прашањето за гласањето на дијаспората не било тема на претходните политички разговори и дека предлогот за електронско гласање бил воведен подоцна.
„Одеднаш сите бевме изненадени со предлогот за електронско гласање на дијаспората. Тоа покажува дека ВМРО-ДПМНЕ има непредвидливи позиции чија цел е да го задржи статус-квото“, изјави Мециновиќ.
Тој смета дека моделот со една изборна единица не ѝ одговара на владејачката партија бидејќи би влијаел врз бројот на освоени пратенички мандати, додека гласањето на дијаспората, според него, би можело да ѝ донесе дополнителна предност.
Осврнувајќи се на прашањето за гласањето на иселениците, Мециновиќ рече дека Левица не е против нивно поголемо учество во изборниот процес, но смета дека тоа не смее да биде замена за реформите во изборниот модел.
Како можен компромис, тој предложи дијаспората да гласа по пошта на претседателските избори, но само доколку истовремено биде воведена една изборна единица.
Во однос на финансирањето на изборните кампањи, Мециновиќ повтори дека Левица останува на ставот средствата за платено политичко рекламирање целосно да се укинат.
„Последните локални избори чинеа речиси 10 милиони евра, а околу две третини од тие средства завршија за платено политичко рекламирање. Наш предлог е тие пари да се пренаменат за јавниот интерес – за амбулантни возила, онкологија и други потреби на здравството. Така би се заштедиле околу седум милиони евра, а изборната кампања би се водела преку јавни дебати“, изјави Мециновиќ.
Тој додаде дека Левица и претходно учествувала на избори без средства за платено политичко рекламирање и дека повторно е подготвена да настапи под такви услови.
