„ЕСМ е бунар без дно за богатење на нивните соработници“ – Левица бара интерпелација за Божиновска

Пратениците на Левица бараат Собранието да изгласа интерпелација за министерката за енергетика Сања Божиновска, обвинувајќи ја дека не презела соодветни мерки за подобрување на состојбите во електроенергетскиот сектор и заштита на интересите на граѓаните.

— реклама —

Пратеникот Амар Мециновиќ упати критики за досегашното работење на министерката, оценувајќи дека и покрај искуствата од претходните енергетски кризи, надлежното министерство не успеало да ги реши проблемите во секторот.

— реклама —

„Ова министерство дојде откако ги преживеавме едни од најстрашните кризи на континентот, знаеше што требаше да преземе за да го заштити интересот на граѓанинот. Но гледаме само премолчувања со кои се храни овој електроенергетски систем“, изјави Мециновиќ.

Тој се осврна и на финансиската состојба на државната компанија ЕСМ, тврдејќи дека таа има долгови од милиони евра и дека состојбите не се подобрени ниту по две години од доаѓањето на ВМРО-ДПМНЕ на власт.

— реклама —

„Очигледно е дека никогаш не била ни намера да се консолидира ЕСМ. Го третираат само како бунар без дно за богатење на нивните соработници“, рече Мециновиќ.

Со ваквите обвинувања, Левица ја доведува во прашање одговорноста на министерката за управувањето со енергетскиот сектор и бара пратениците да се изјаснат за интерпелацијата.