Мециновиќ: ДПМНЕ го исклучи народот од одлучувањето за сопствените пари – не прифати ниту еден од 124-те амандмани на опозицијата за ребалансот на Буџетот

Пратеникот на Левица, Амар Мециновиќ, ја критикуваше власта поради одбивањето на сите 124 амандмани поднесени од опозицијата за вториот ребаланс на Буџетот за 2026 година. Според него, со ваквиот однос ВМРО-ДПМНЕ ги исклучува граѓаните од одлучувањето за трошењето на јавните средства.

— реклама —

Мециновиќ посочи дека ребалансот се носи само два месеци по претходниот, а неколку дена пред расправата за Буџетот за 2027 година, што, според него, отвора прашања за планирањето на јавните финансии.

— реклама —

Меѓу одбиените предлози, како што наведе, имало амандмани за следење на загадувачите, социјална заштита и инфраструктура, набавка на нови автобуси за Скопје, како и средства за проблемите со рудниците во југоисточниот дел на државата и проектите „Чебрен“ и „Галиште“.

— реклама —

„Буџетот на Р. Македонија не е партиска сопственост, иако Владата на ВМРО-ДПМНЕ така го перципира“, изјави Мециновиќ, оценувајќи дека владејачкото мнозинство ги става политичките интереси пред потребите на граѓаните.

— реклама —

Од Левица сметаат дека вториот ребаланс покажува отсуство на развојна економска политика и најавуваат дека нема да го легитимираат, како што го оценија, недемократскиот процес на носење на Буџетот.