Министерот за правда, Игор Филков, потпиша колективен договор со синдикатите, со кој административните службеници ќе добијат етапно зголемување на платите што до 2028 година ќе достигне вкупно 21%.
Зголемувањето ќе се реализира во три фази – по 7% од март 2026, март 2027 и март 2028 година, со што постепено ќе се зголемуваат примањата на вработените во ресорот правда.
Покрај растот на платите, договорот предвидува и дополнителни права, меѓу кои додатоци за ноќна работа, работа во смени, празници и прекувремена работа, како и јубилејни награди и регрес за годишен одмор.
Опфатени се и мерки за заштита од вознемирување на работното место, како и подобрување на условите за безбедност и здравје при работа.
Од Министерството оценуваат дека договорот ќе придонесе за поголема мотивација кај вработените, но и за повисоко ниво на одговорност, ефикасност и професионалност, со цел подобрување на услугите кон граѓаните.
