Пленковиќ на Денот на Европа: Не смееме да ја заборавиме Украина

Хрватскиот премиер Андреј Пленковиќ денеска, честитајќи го Денот на Европа на социјалната платформа X, предупреди дека треба да се потсетиме на Украина која, соочена со руската агресија, ја брани „својата слобода и темелните европски вредности“.

„Го славиме Денот на Европа, се присетуваме на Шумановата визија за континент кој по страшни воени разурнувања и длабоки поделби избира мир, соработка и заедничка иднина“, напиша Пленковиќ на X.

— реклама —

— реклама —

Тој нагласи дека Европа не е само простор во кој живееме, туку и избор „на слободата над стравот, правото над силата и солидарноста над поделбите“, кој секојдневно се потврдува.

„Затоа денес мора да се потсетиме и на Украина, која се брани од бруталната руска агресија веќе повеќе од четири години и ја штити својата слобода и темелните европски вредности“, порача хрватскиот премиер.

— реклама —

Тој додаде и дека Хрватска како „горда членка“ на Европската Унија учествува во обликување на заедничките одлуки и одредување на правецот на блокот, „со цврста припадност кон цивилизациските вредности кои ги делиме“.

„Европската Унија не е само институционална рамка, таа во Хрватска е видлива во секојдневниот живот, во нови училишта, градинки и болници, во патишта и мостови, во обновени згради и економски проекти кои ги развиваат сите краеви на Хрватска и го подигнуваат квалитетот на животот на граѓаните и стопанствениците“, истакна Пленковиќ.

„Со вера во подобра заедничка европска иднина, на сите граѓанки и граѓани на Хрватска им го честитам Денот на Европа“, рече тој.