По губењето на власта, на ред се и вилите: Вучиќ, Брнабиќ и Николиќ пред можно иселување

Александар Вучиќ, Ана Брнабиќ и Томислав Николиќ би можеле да останат без правото да ги користат државните вили во елитната белградска населба Дедиње, по изборниот пораз на Српската напредна странка (СНС) и најавената промена на власта во Србија, објави порталот „Нова.рс“.

Според извор од српската влада на кој се повикува медиумот, досегашните функционери ќе мора да ги напуштат државните резиденции кога новиот државен врв ќе ги преземе функциите.

„Ќе мора да се иселат во моментот кога ќе дојдат нов претседател или претседателка на државата и нова влада. Можно е да останат нешто подолго во државните вили, но само доколку безбедносните служби проценат дека нивната безбедност е загрозена“, изјавил изворот за „Нова.рс“.

— реклама —

Во таков случај, според истиот извор, би можеле привремено да бидат преместени на друга заштитена локација, додека не престанат евентуалните безбедносни ризици.

Ана Брнабиќ од ноември 2020 година ја користи таканаречената „Јованкина вила“, сместена на булеварот „Кнез Александар Караѓорѓевиќ“ во Дедиње. Објектот има површина од околу 750 квадратни метри, а во него некогаш живеела Јованка Броз.

Брнабиќ се вселила во резиденцијата додека била премиерка, но останала таму и по преземањето на функцијата претседателка на Народното собрание во март 2024 година. За да се овозможи нејзиното понатамошно користење, српската влада во јули истата година ја изменила уредбата со која вилата престанала да биде премиерска резиденција и станала репрезентативен објект наменет за претседателот на Собранието.

— реклама —

Пред измената, прописите предвидувале иселување од државните резиденции најдоцна шест месеци по престанувањето на мандатот.

Александар Вучиќ официјално ја користел вилата „Бокељка“ во улицата „Толстоева“, исто така во Дедиње. Станува збор за објект со површина од околу 1.700 квадратни метри, кој се користел за државни состаноци, приеми на странски делегации и други протоколарни активности. Српските медиуми претходно објавуваа дека Вучиќ не живеел постојано во оваа резиденција.

Посебен е случајот на поранешниот претседател Томислав Николиќ, кој со сопругата Драгица од август 2012 година користи државна вила на улицата „Ужичка“ број 23.

— реклама —

Иако неговиот претседателски мандат завршил во 2017 година, Николиќ продолжил да ја користи вилата. Во ноември 2018 година владата ја променила намената на објектот и го доделила за потребите на претседателот на Националниот совет за координација на соработката со Русија и Кина, функција што ја извршувал Николиќ.

Промената на власта би можела да влијае и врз користењето на други вредни државни недвижности во Дедиње. Меѓу нив е и Клубот на пратениците во улицата „Толстоева“, кој преку државната компанија ДИПОС го изнајмил бизнисменот Александар Кајмаковиќ, познат како Аца Босанац.

Според изворот на „Нова.рс“, дали Кајмаковиќ ќе остане закупец ќе зависи од одлуките на новата влада.

Порталот потсетува дека опозициски политичари во август побарале од обвинителството да го испита управувањето со државниот имот со кој располага ДИПОС за време на владеењето на СНС од 2012 година.

Засега нема официјална одлука за иселување на поранешните функционери, ниту потврда дека новата власт ќе ги преиспитува досегашните решенија за користење на државните резиденции.

Прашањето се отвора по победата на Студентската листа на парламентарните избори во Србија, на кои, според прелиминарните резултати наведени во извештајот, таа освоила 52,73 отсто од гласовите, наспроти 39,15 отсто за листата предводена од Вучиќ.