По кршењето на канделабрата: Општина Карпош бара поголема одговорност од родителите

Општина Карпош изрази сериозна загриженост поради зачестените случаи на вандализам и уништување на урбаната опрема и детските игралишта на нејзината територија, апелирајќи до граѓаните и родителите за поголема одговорност и грижа за јавниот простор.

Според општината, во изминатиот период биле евидентирани бројни оштетувања на клупи, корпи за отпадоци, држачи за велосипеди, детски и спортски реквизити, како и на друга урбана опрема.

— реклама —

„Последниот случај на кршење на канделабра, на највандалски начин, од страна на малолетни деца, дополнително ја отвора потребата од поголема грижа, одговорност и превенција. Покрај нанесената материјална штета, станува збор и за сериозно загрозување на безбедноста на граѓаните во јавниот простор“, соопштија од Општина Карпош.

Оттаму информираат дека сите досега евидентирани случаи биле пријавени во Полициската станица Карпош, од каде што добиле уверување дека ќе има засилено полициско присуство на терен и активности за расчистување на инцидентите.

— реклама —

Општината упати апел до граѓаните совесно да се однесуваат кон јавниот имот и навремено да ги пријавуваат сите случаи на вандализам до надлежните служби.

— реклама —

Воедно, се повикуваат и родителите да покажат поголема информираност за движењето и однесувањето на своите деца, како и преку разговор да им укажат на значењето од зачувувањето на јавниот простор и последиците од несоодветното однесување.

„Да го чуваме заедничкиот простор, затоа што јавниот имот е одговорност на сите нас“, порачуваат од Општина Карпош.