Вчерашното невреме што зафати повеќе градови низ Македонија предизвика сериозни оштетувања на електродистрибутивната мрежа, оставајќи без напојување илјадници корисници. Од Електродистрибуција информираат дека досега се санирани околу 90 отсто од дефектите.
Според компанијата, силното невреме ја оштетило дистрибутивната мрежа и на среден и на низок напон, а поради оштетувањата и неколкуте стотици паднати столбови, без електрична енергија останале 2.308 трафостаници.
Засилените екипи на Електродистрибуција работеле непрекинато во исклучително тешки услови и успеале да го вратат напојувањето на најголемиот дел од погодените подрачја. Во моментов, без струја сè уште се околу 300 трафостаници низ државата.
Од компанијата посочуваат дека санацијата на преостанатите дефекти е отежната поради паднатата вегетација, која на многу места целосно го блокира пристапот до оштетената мрежа. Сепак, екипите продолжуваат интензивно да работат сè до целосно нормализирање на снабдувањето.
Најпогодени од невремето биле делови од Скопје, Куманово, Кочани и други населени места низ Македонија.
Од Електродистрибуција им се заблагодаруваат на граѓаните за трпението и разбирањето и истакнуваат дека сите расположливи човечки и технички ресурси остануваат ангажирани сè додека не се отстранат сите дефекти и не се воспостави редовно снабдување со електрична енергија.
