По посетата на Зеленски – Приштина го тргна украинското знаме, Вучиќ: „Единствено искрено е дека ја мразат Србија“

Отстранувањето на украинското знаме од една од зградите во центарот на Приштина предизвика реакција од српскиот претседател Александар Вучиќ, кој оцени дека потегот покажува дека поддршката на Приштина за Украина, според него, била мотивирана од политички интереси кон Србија.

— реклама —

„Сега гледате дека Приштина не ја поддржувала Украина искрено, туку само затоа што мислеле дека Украина и Европа ќе направат нешто против нас. Единствено искрено е тоа што ја мразат Србија и Србите“, изјави Вучиќ, одговарајќи на новинарски прашања.

Украинското знаме беше поставено на фасадата на зграда во центарот на Приштина по почетокот на руската инвазија врз Украина. Неговото отстранување следуваше еден ден по посетата на украинскиот претседател Володимир Зеленски на Белград.

— реклама —

За време на посетата, Зеленски порача дека ставот на Киев во однос на непризнавањето на Косово останува непроменет.

— реклама —

Градоначалникот на Приштина, Пëрпарим Рама, на „Фејсбук“ објави снимки од отстранувањето на знамето и порача дека „Косово мора да биде почитувано“.

Рама наведе дека граѓаните на Приштина ќе продолжат да покажуваат солидарност со народите кои се соочуваат со војни, насилство и прогон, но оцени дека ниту една политичка цел не треба да се гради со, како што наведе, омаловажување на државноста на Косово и жртвата на неговиот народ.

Отстранувањето на знамето дополнително ги нагласи политичките тензии меѓу Белград и Приштина, особено во контекст на позициите на Украина кон Косово и Србија.