По повеќе од две децении, училиштето во малото село Џиностра на италијанскиот вулкански остров Стромболи повторно ги отвори вратите. Во училишните клупи засега ќе седи само едно дете – шестгодишната Ајша, која на првиот училишен ден ја пречекала нејзината наставничка Лаура Монџи.
Џиностра е мало и изолирано место на западниот дел од Стромболи, каде што во текот на зимата живеат околу 40 жители. До селото може да се стигне само по морски пат, а новото училиште е сместено во простории што ги отстапила локалната црква „Сан Винченцо Ферери“.
За повторното отворање на училиштето со години се залагале родителите на Ајша, кои сакале нивната ќерка да го започне образованието во местото во кое живеат. Проблемот бил особено голем во зимските месеци, кога морските врски се отежнати, а заминувањето на детето на друго место за училиште би значело и преселување или разделување на семејството.
Иницијативата на семејството била поддржана од општината Липари и образовните власти, по што било одобрено повторното отворање на училиштето. Просторијата во црковниот објект неодамна била реновирана и е отстапена за потребите на основното училиште.
Стромболи се наоѓа во Тиренското Море, северно од Сицилија, и е дел од Еолските Острови. Островот е познат по активниот вулкан Стромболи, висок околу 930 метри.
Повторното отворање на училиштето се гледа и како можност за запирање на долгогодишното намалување на бројот на жители на малите островски населби. Градоначалникот на Липари, Рикардо Гуло, се надева дека училиштето ќе придонесе семејствата да имаат причина да останат во Џиностра наместо да се иселуваат поради образованието на децата.
