Телото на Луиџи Кавалари (84), сопруг на италијанската министерка за семејство Еуџенија Рочела, е пронајдено во езерото Вико во покраината Витербо, повеќе од еден месец откако исчезна за време на капење.
Кавалари исчезнал на 27 јуни, откако скокнал во езерото. Неговото тело денеска го пронашле полициски нуркачи, по обемна потрага што траела повеќе од еден месец. Телото било извлечено на брегот, а обвинителството во Витербо наложило обдукција за да се утврди точната причина за смртта.
Во потрагата учествувале специјализирани тимови од цела Италија, кои користеле сонари и подводни роботи поради исклучително слабата видливост и тешките услови на дното на езерото, покриено со кал и густи алги.
Кавалари и министерката Рочела, која е член на владата на премиерката Џорџа Мелони, годинава одбележале 50 години брак. Тие имаат две деца, а својот приватен живот го држеле далеку од јавноста. Кавалари бил инженер, универзитетски професор и академик.
Според италијанските медиуми, трагедијата се случила додека престојувале во нивната семејна куќа покрај езерото Вико. По скокот во водата, Кавалари повторно излегол на површината и се пожалил дека не се чувствува добро, по што исчезнал под водата.
Токму министерката Рочела веднаш ги известила итните служби. Неколку дена по неговото исчезнување, таа јавно им се заблагодари на сите кои ѝ пружиле поддршка во овие тешки моменти.
