Симона Зориќ, сопруга на судијата Ѓоко Ристов, кој е опфатен во постапката за парите пронајдени заѕидани во куќата на неговите родители, јавно ја прозва обвинителката Искра Хаџи Василева со серија тешки обвинувања за нејзиното постапување и однесување.
Во објава на социјалните мрежи, Зориќ тврди дека обвинителката кон неа има „личен анимозитет“ и дека тоа, според неа, се манифестира во судница.
„Искра Хаџи Василева, информативно само сериозен и способен обвинител силите и оружјата ги мери во судница“, пишува Зориќ.
Таа понатаму наведува дека личниот анимозитет кон неа бил очигледен за јавноста, но и за колегите кои, како што тврди, треба да ја гласаат.
„Тоа што имаш личен анимозитет спрема мене е на очиглед на јавноста и нервозата која ја манифестираш во судница, па и колегите што треба да те гласаат веќе јавно го зборуваат“, наведува Зориќ, алудирајќи на пријавата на обвинителката да биде нова шефица на Обвинителството за гонење организиран криминал и корупција
Во објавата таа оди и подалеку, тврдејќи дека постоеле закани кон неа и поврзувајќи го случајот со таблички на возило на нејзините родители.
Зориќ во истата објава го споменува и сопругот на обвинителката, за кого наведува дека работи како „млад референт“ во Агенцијата за храна и ветеринарство, при што изнесува и тврдење за негово работно отсуство. Овие наводи се изнесени од Зориќ и не се независно потврдени.
Објавата доаѓа во период кога против нејзиниот сопруг, судијата Ѓоко Ристов, се води постапка поврзана со случајот во кој беа пронајдени заѕидани пари во куќата на неговите родители.
