По спектаклот со Гета, Скопје се чистеше до рано наутро

По големата прослава на независноста на Македонија и настапот на Дејвид Гета во Скопје, екипите на Град Скопје веднаш по завршувањето на настанот започнале со расчистување на просторот околу стадионот „Тодор Проески“ и во Градскиот парк, објави градоначалникот Орце Ѓорѓиевски.

Ѓорѓиевски посочи дека работата на екипите продолжила во текот на ноќта и до раните утрински часови, со цел по завршувањето на големиот настан просторот повторно да биде чист и уреден.

— реклама —

„По ноќта исполнета со музика, радост и илјадници граѓани кои ја славеа независноста на Македонија, грижата за Скопје продолжи до раните утрински часови“, напиша Ѓорѓиевски.

Тој упати благодарност до работниците кои, како што наведе, ноќта ја поминале на терен и се грижеле за расчистување на просторот.

— реклама —

„Нивниот труд, честопати далеку од вниманието на јавноста, заслужува почит од сите нас“, порача градоначалникот.

— реклама —

Ѓорѓиевски нагласи дека обврските кон градот продолжуваат и по завршувањето на големите настани.

„За нас, крајот на еден настан никогаш не е крај на обврската кон градот. Грижата за Скопје не запира“, порача тој.