Побрзи интервенции и подобра организација: Скопје добива нов самостоен Центар за итна медицинска помош

Владата ја усвои информацијата за формирање Центар за итна медицинска помош Скопје, на предлог на Министерството за здравство, со цел подобрување на системот за итни медицински интервенции и побрз одговор при спасување човечки животи.

— реклама —

Од Министерството за здравство информираат дека со оваа реформа ќе се воспостави поефикасен и поодржлив систем за итна медицинска помош, ќе се скрати времето на интервенција и ќе се зајакнат капацитетите на службата.

Министерот за здравство Азир Алиу посочи дека издвојувањето на Итната медицинска помош како самостојна институција претставува значајна системска реформа, која ќе овозможи поголема организациска и оперативна самостојност.

— реклама —

„Со формирањето на Центар за итна медицинска помош ќе се овозможи поефикасно управување со ресурсите, посебно буџетско планирање, побрзо донесување одлуки и подобрување на одговорот на итните повици. Не станува збор за создавање нов систем, туку за институционално зајакнување и модернизација на постојната организација“, изјави Алиу.

— реклама —

Во првата фаза е предвидено Итната медицинска помош во Скопје да се издвои како самостојна институција, по што постепено ќе следува интегрирање и на останатите служби во рамките на идниот Центар за итна медицинска помош.

Од Министерството наведуваат дека реформата е базирана на позитивните искуства од земјите во регионот, каде итната медицинска помош функционира како посебна институционална структура, што овозможува подобра координација, поефикасно користење на ресурсите и воспоставување единствени стандарди за работа.

Според надлежните, формирањето на Центарот ќе помогне и во надминување на долгогодишните кадровски и организациски предизвици, со цел граѓаните да добијат поквалитетна и поефикасна итна медицинска помош.