Почина напаѓачот од Краков, полицијата откри и тројно убиство во неговиот семеен дом

Дваесет и четиригодишниот Михал Оксињски, кој завчера на главниот плоштад во полскиот град Краков уби шест лица и рани уште 15, починал рано утрово во болница од последиците од тешките повреди здобиени во престрелката со полицијата, потврди локалната полиција.

— реклама —

Нападот се случил околу 15 часот, кога Оксињски со автомобил пристигнал на главниот плоштад и со полуавтоматска пушка АР-15 отворил оган кон минувачите, туристите и таксистите. Загинале шест лица на возраст од 32 до 61 година, меѓу кои и австриски државјанин, а уште 15 биле повредени.

— реклама —

По нападот полицијата започнала потера по неговиот црн автомобил „субару“. На една раскрсница тој се судрил со запрено возило, по што излегол облечен во воена униформа, со кацига, маска и тактички елек, и почнал да пука кон полициските службеници. Тешко ранил двајца полицајци, но еден од нив, и покрај сопствените повреди, успеал да го совлада и да го застрела. Напаѓачот бил пренесен во болница во животозагрозувачка состојба, каде што утрово починал.

Во текот на истрагата полицијата открила уште едно злосторство во неговиот роден град Островјец Швјентокшиски, на околу два часа возење од Краков. Во семејниот стан биле пронајдени телата на неговиот 52-годишен татко, 51-годишната мајка и 21-годишната сестра. Според досегашните сознанија, сите тројца биле убиени со огнено оружје пред нападот на главниот плоштад.

— реклама —

Обвинителството во Краков го води случајот како терористичко кривично дело. При ноќните претреси во Краков и Островјец Швјентокшиски истражителите заплениле поголемо количество муниција и 11 парчиња огнено оружје.

— реклама —

Полскиот министер за внатрешни работи Марчин Кервињски изјавил дека сите досегашни сознанија упатуваат на тоа дека Оксињски дејствувал самостојно и бил приврзаник на крајнодесничарска идеологија и ултранационалистички ставови. Според него, младиот маж претходно немал криминално досие. Полските медиуми објавиле дека секоја недела одел со својот татко на локално стрелиште, каде што вежбале пукање.