(Видео) Полската влада го окарактеризира пукањето во Краков како терористички чин, напаѓачот бил приврзаник на крајнодесничарски идеи

Полските власти го истражуваат пукањето во центарот на Краков, во кое во саботата загинаа шест лица, а нападот го оквалификуваа како терористички чин насочен против жителите и туристите во градот.

Вицепремиерот и министер за одбрана на Полска, Владислав Кошњак-Камиш, на прес-конференција во Краков им изрази сочувство на семејствата на загинатите и потврди дека станува збор за напад со терористички карактер. Тој ги отфрли информациите дека осомничениот бил поврзан со војската, нагласувајќи дека надлежните треба да објавуваат само проверени податоци.

— реклама —

Министерот за внатрешни работи Марчин Кјервински изјави дека осомничениот имал изразено радикални, најверојатно крајнодесничарски ставови. Според него, брзата реакција на полицијата спречила поголем број жртви, а првите истрели кон напаѓачот биле испукани само три минути по пријавата за инцидентот. Во приближно исто време на местото пристигнале и пожарникарите и екипите на Итната медицинска помош.

Осомничениот е полски државјанин, роден во 2002 година, кој живеел во Швјентокшишкото војводство. Според министерот, досегашните сознанија упатуваат на тоа дека бил приврзаник на крајнодесничарски идеологии, но оваа околност допрва ќе се утврдува во истрагата.

— реклама —

Во автомобилот со кој пристигнал на местото на нападот било пронајдено поголемо количество оружје. Една од истражните претпоставки е дека оружјето можеби го зел од семејната куќа, бидејќи неговиот татко поседувал дозвола за неколку парчиња оружје. Сепак, полицијата засега не го утврдила потеклото на оружјето.

Во истрагата се вклучени полицијата и Агенцијата за внатрешна безбедност, а во тек е и претрес на домот на осомничениот.

Министерот за правда и државен обвинител Валдемар Журек ги повика жителите и туристите да останат во своите домови и хотели и да ги следат официјалните известувања на полицијата, за да не ја попречуваат истрагата.

— реклама —

Градоначалникот на Краков, Лукаш Гибала, апелираше граѓаните да не споделуваат непроверени информации и снимки од местото на нападот, како и да го избегнуваат главниот градски плоштад доколку немаат неопходна причина да бидат таму. Тој порача дека насилството нема да го промени карактерот на Краков, кој, како што истакна, ќе остане отворен и гостопримлив град.

Според локалните медиуми, напаѓачот околу 15 часот со автомобил „субару“ влегол на главниот плоштад од улицата Славковска и отворил оган врз присутните граѓани. Потоа пукал и кон полицајците кои тргнале во потера по него. Во размената на оган со полицијата бил ранет, по што бил уапсен.

— реклама —

По нападот, градоначалникот на Краков прогласил четиридневна жалост, која ќе трае до 11 ноември.

View this post on Instagram