Почнува голема воена вежба во Кина: Пекинг и Сингапур со заеднички поморски операции

Кина и Сингапур на почетокот на септември ќе одржат заедничка поморска воена вежба „Поморска соработка-2026“, соопшти кинеската страна. Вежбата ќе се реализира во водите и во воздушниот простор во близина на Џанџијанг, во кинеската провинција Гуангдонг.

Според најавите, целта е да се продлабочи меѓусебната доверба, да се унапреди практичната соработка и да се зајакнат способностите на двете земји за заедничко зачувување на регионалниот мир и стабилност.

— реклама —

Кина и Сингапур досега одржале четири вакви заеднички поморски вежби, при што првата била реализирана во 2015 година. Оттогаш, двете морнарици воспоставиле редовен механизам за одржување на вежбите, со наизменично преземање на улогата на домаќин. Обемот и значењето на овие активности, според кинеските извори, постепено се зголемуваат.

Минатогодишната вежба се одвивала во три фази – активности во пристаниште, вежби на море и завршна церемонија. Во поморскиот дел биле опфатени заеднички напади врз површински цели, дополнување резерви за време на пловидба, заедничко пребарување и спасување, како и операции на качување и проверка на пловила.

— реклама —

Воениот стручњак Џанг Џунше оцени дека делот посветен на пребарување и спасување има особено практично значење.

Јужното Кинеско Море е една од најважните меѓународни поморски сообраќајници, со голем број пловни патишта и интензивен сообраќај. Истовремено, сложените временски и морски услови во регионот придонесуваат за чести природни непогоди и вонредни ситуации на море.

Според Џанг, и Кина и Сингапур имаат обврски за поморско спасување во одредени делови од Јужното Кинеско Море, во согласност со зоните на одговорност утврдени од Меѓународната поморска организација.

— реклама —

На вежбата ќе бидат опфатени и борбени гаѓања и дополнување резерви на отворено море. Според кинескиот воен стручњак, борбените вежби им овозможуваат на екипажите да ги усовршат вештините за употреба на оружјето, додека дополнувањето резерви за време на пловидба ги проверува и подобрува способностите за долготрајно дејствување на отворено море.

Џанг истакна дека „Поморска соработка“ има двојна цел – од една страна да ја продлабочи довербата и соработката меѓу двете земји, а од друга да ги унапреди нивните способности за заедничко дејствување.

Според него, ваквите активности придонесуваат за зајакнување на практичната подготвеност на двете страни за заедничко справување со предизвиците во поморската безбедност и за зачувување на мирот и стабилноста во регионот.

Покрај редовните вежби со Сингапур, Кина одржува заеднички воени вежби и обуки и со други соседни земји, меѓу кои Тајланд, Камбоџа и Лаос.