Европа влезе во нова клучна фаза од еден од најголемите инфраструктурни проекти во светот – изградбата на тунелот Бренер под Алпите, кој по завршувањето ќе стане најдолгиот подземен железнички тунел на планетата.
Новата фаза од проектот официјално започна откако огромната машина за пробивање тунели „Катрин“ почна со работа на тунелот Гардена, на јужниот пристап кон коридорот Бренер меѓу Италија и Австрија.
Станува збор за импресивна TBM машина (Tunnel Boring Machine) долга 144 метри, со глава за бушење со пречник од речиси 10 метри.
Машината е специјално дизајнирана за исклучително сложените геолошки услови на Алпите и може да работи во два режима, во зависност од видот на карпата низ која минува.
„Катрин“ сега ја започна најтешката фаза од проектот, по завршувањето на пристапниот тунел Фунес, со кој е овозможен пристап до планинскиот масив.
Планирано е пробивање на повеќе од 16 километри тунел и поставување околу 9.000 бетонски сегменти за обложување на тунелските цевки.
Базниот тунел Бренер е дел од огромен европски коридор што ги поврзува Скандинавија и Медитеранот. Целиот систем на тунели ќе биде долг дури 64 километри и ќе стане најдолгиот подземен железнички тунел во светот.
Целта на проектот е значително забрзување на железничкиот сообраќај, зголемување на капацитетот за товарен транспорт и префрлање милиони тони стока од автопатиштата на железница.
Европските власти го сметаат проектот за клучен во намалувањето на сообраќајниот метеж и емисиите на CO2 на една од најфреквентните транспортни рути во Европа.
По завршувањето на проектот, патувањето меѓу Италија и Австрија ќе биде значително побрзо, а железницата ќе преземе голем дел од товарниот транспорт што денес се одвива преку алпските патишта.
Европските медиуми веќе го нарекуваат Бренер еден од најважните инфраструктурни проекти на иднината, бидејќи би можел целосно да го промени транспортот на стока меѓу северот и југот на континентот.
