Портпаролката и членка на Извршниот одбор на СДСМ, Богданка Кузеска, тврди дека започнало, како што вели, „разоткривањето на Орбановата мафијашка мрежа“, оценувајќи дека тоа наскоро ќе има одраз и во Македонија.
Во својата изјава, Кузеска посочи дека процесите во Унгарија се поврзани со политичките случувања во земјава.
„Започна разоткривањето на Орбановата мафијашка мрежа, сè ќе видат граѓаните на Македонија“, изјави Кузеска.
Таа се повика на изјавите на унгарскиот политичар Петер Маѓар, за кого рече дека ја отвора темата за корупција и злоупотреби во Унгарија.
„Петер Маѓар ја пушти лавината. Наскоро и граѓаните на Македонија ќе ја видат вистината за Мицкоски и ВМРО-ОКГ“, рече Кузеска.
Според неа, станува збор за систем кој, како што тврди, вклучува трансфер на средства, продажба на медиуми под пазарна вредност и потенцијални обиди за прикривање имот.
„Маѓар јавно соопшти дека Орбановите тајкуни масовно префрлаат десетици милијарди форинти во Обединетите Арапски Емирати, САД, Уругвај и други земји“, наведе Кузеска.
Во изјавата се изнесени и конкретни тврдења за поврзаност меѓу македонската власт и унгарски политички и бизнис структури.
„Мицкоски и целата ВМРО-ОКГ се најблиските Орбанови партнери и пријатели на Балканот“, рече Кузеска.
Таа додаде дека, според СДСМ, дел од медиумскиот простор во Македонија, како и одредени економски проекти, се поврзани со структури блиски до унгарскиот премиер Виктор Орбан.
„Сè што Маѓар сега го разоткрива во Унгарија – перење пари, контрола на медиуми, тајни бизниси, корупција, директно се пресликува и во Македонија“, изјави Кузеска.
Таа заклучи дека, според нивната оценка, следува период во кој, како што рече, „граѓаните ќе ја видат вистината“.
Од ВМРО-ДПМНЕ засега нема реакција на овие обвинувања.
