Дрон рано во четвртокот погодил разладна кула на еден од реакторските блокови во нуклеарната електрана Курск во Русија, соопшти Меѓународната агенција за атомска енергија (МААЕ).
Според информациите што ги добила МААЕ, ударот се случил на 17 септември, додека реакторскиот блок бил во работа. По инцидентот не бил променет режимот на работа, а не избувнал ниту пожар.
МААЕ засега не соопшти за кој реакторски блок станува збор, ниту кој управувал со дронот.
Генералниот директор на МААЕ, Рафаел Гроси, повторно предупреди дека нападите врз нуклеарни постројки може да ја загрозат нуклеарната безбедност, без оглед на тоа каде се случуваат. Тој ги оцени ваквите напади како неприфатливи и повика на максимална воена воздржаност за да се избегне ризикот од нуклеарна несреќа.
Нуклеарната електрана Курск се наоѓа во близина на градот Курчатов, релативно блиску до границата со Украина. На локацијата, покрај постарите реактори РБМК-1000, се гради и новата електрана Курск 2 со реактори од типот ВВЕР-ТОИ. Првиот нов блок влезе во комерцијална употреба на 1 мај годинава.
Ова не е прв инцидент со дронови во близина на нуклеарната електрана Курск. МААЕ во јули соопшти дека Русија ја информирала оти на 5 јули дрон погодил и оштетил разладна кула на вториот блок на Курск 2, кој во тој период сè уште бил во изградба. Руските власти тогаш ја обвинија Украина за нападот, додека Киев не ги коментираше тие тврдења.
Во август минатата година, според руските власти, дрон бил соборен во близина на електраната, по што експлозија оштетила помошен трансформатор. Избувнал пожар, а моќноста на третиот реакторски блок привремено била намалена за 50 проценти. Тогаш немало повредени, а измереното ниво на радијација останало во нормални граници.
