Русија и Украина разменија масовни напади по најавите за мировни преговори

Само неколку часа по сигналите за можен напредок во мировните преговори со посредство на САД, Русија и Украина разменија масовни напади врз своите територии. Во Киев има повредени, а погодени се и станбени објекти и инфраструктура во повеќе региони.

Ракети го погодија Киев во раните утрински часови, при што најмалку 15 лица беа повредени, од кои осум биле хоспитализирани, соопштија градските власти. Оштетена е и инфраструктурата на метрото кај Јужниот мост над реката Днепар, информираше градоначалникот Виталиј Кличко.

— реклама —

Украинскиот министер за надворешни работи Андриј Сибиха го осуди нападот, наведувајќи дека биле погодени енергетска инфраструктура, медицински установи, трговски центри и станбени населби.

Во руски напад во регионот Харков загинала една жена, а четири лица биле повредени. Во регионот Полтава, пак, дрон погодил дел од енергетската инфраструктура, соопштија локалните власти.

— реклама —

Во меѓувреме, градоначалникот на Москва, Сергеј Собјанин, соопшти дека кон регионот биле лансирани 630 дронови, од кои 163 биле насочени кон руската престолнина. Поголемиот дел биле уништени од противвоздушната одбрана, а најмалку две лица биле повредени.

Во рускиот град Липецк, дронови погодиле станбени згради и медицинска установа, при што бил повреден еден маж, соопшти регионалниот гувернер Игор Артамонов.

— реклама —

Нападите следуваат по дипломатските активности на американскиот специјален пратеник Стив Виткоф, кој претходно разговарал со украинскиот претседател Володимир Зеленски во Норвешка, а во средата се сретнал и со рускиот претседател Владимир Путин во Санкт Петербург.

Администрацијата на американскиот претседател Доналд Трамп се обидува да посредува меѓу Москва и Киев за завршување на војната, започната со целосната руска инвазија врз Украина во 2022 година.

Путин начелно се согласил мировните разговори со посредство на САД да продолжат следниот месец. Зеленски, пак, изјави дека Украина го поддржува американскиот предлог за трилатерални разговори на ниво на преговарачи, кои би се одржале што е можно поскоро.

По средбата со Путин, Трамп оцени дека ова е „најблиску што сме биле“ до завршување на војната. Сепак, најавите за продолжување на преговорите не ги спречија двете страни да продолжат со меѓусебните напади.