Полицаец испукал четири куршуми кон маж кој со нож нападнал жена во Лутон

Британската полиција застрелала и ранила маж во Лутон, откако тој со нож повеќепати ја повредил една жена, соопшти Независната канцеларија за полициско однесување (IOPC), која отвори истрага за употребата на огнено оружје.

— реклама —

Инцидентот се случил вчера, кога еден полицаец испукал четири куршуми кон мажот, додека друг употребил гумен куршум. Повредениот бил пренесен во болница на лекување.

Во болница била пренесена и жената која била нападната со нож. Според досегашните информации, нејзиниот живот не е во опасност.

— реклама —

Директорката за комуникации на IOPC, Емили Бари, изјави дека полицајците ретко употребуваат огнено оружје, но дека секој ваков случај мора независно да се испита за да се утврдат околностите.

— реклама —

„Во оваа фаза можеме да потврдиме дека сите инволвирани полицајци се третираат како сведоци, бидејќи нема индикации дека ги прекршиле професионалните полициски стандарди или сториле кривично дело“, наведе Бари.

Од IOPC соопштија дека службеното огнено оружје било обезбедено за вештачење, а истражителите ги прегледале и снимките од безбедносните камери, како и снимките од камерите поставени на полициските униформи.

— реклама —

Истрагата треба да утврди што точно се случило и дали употребата на огнено оружје од страна на полицајците била оправдана во конкретните околности.