Полициска граната му ја откина раката на 15-годишник во Франција

Петнаесетгодишен ученик е тешко повреден за време на средношколски протест во францускиот град Ленс, при што се здобил со тешка повреда на левата шака. Француската полиција истражува дали повредата е предизвикана од средство што го употребиле припадници на интервентната полиција.

Инцидентот се случил околу 10:30 часот во близина на средното стручно училиште „Огист Бехал“ во Ленс, на северот на Франција. Повредениот ученик бил итно пренесен во болница во Лил, а според досегашните информации, неговиот живот не е во опасност.

— реклама —

Околностите под кои дошло до експлозијата сè уште не се целосно утврдени. Јавниот обвинител од Бетин, Етјен Тиефри, изјавил дека засега не може да се потврди дали ученикот подигнал полициска граната, која потоа експлодирала во неговата рака, или средството паднало врз него.

„Во овој момент не можам формално да кажам дали адолесцентот ја подигнал гранатата, која му експлодирала во раката, или гранатата паднала врз него“, изјавил Тиефри.

— реклама —

Француската полициска инспекција ИГПН отворила истрага за да се утврдат точните околности на инцидентот и какво средство било употребено од полицијата. Обвинителството води истрага за насилство кое предизвикало тешка телесна повреда со можен траен инвалидитет.

Во моментот на инцидентот во близина на училиштето биле собрани меѓу 200 и 250 ученици. Според префектот на департманот Па-де-Кале, Франсоа-Ксавје Лош, дел од нив фрлале камења, пиротехнички средства и други предмети кон полицајците, по што била испратена единица на ЦРС, француската интервентна полиција задолжена за одржување на јавниот ред.

По експлозијата, на повредениот ученик најпрво му помогнале други ученици, а потоа бил преземен од итните медицински служби. Во училиштето е активирана и психолошка поддршка за учениците и вработените, додека наставата е префрлена на далечина.

— реклама —

Инцидентот се случува во период на повеќенеделни средношколски протести низ Франција. Протестите започнале поради недостиг на наставници, големи паралелки, состојбата на училишните објекти и други проблеми во образовниот систем, но дел од нив прераснале и во насилни инциденти.

Француското Министерство за образование денеска соопштило дека различни форми на протести, блокади или нарушувања на наставата биле регистрирани во 413 училишта.

— реклама —

Во последните денови биле регистрирани и други случаи на тешки повреди на малолетни лица за време на протестите, при што во одделни случаи е отворена истрага за постапувањето на полицијата.

Случајот во Ленс повторно го отвора прашањето за начинот на полициското постапување за време на протестите на кои учествуваат голем број малолетници.