Политиките на Заев и Филипче ја приближиле државата кон недемократски режими, вели ВМРО-ДПМНЕ

ВМРО-ДПМНЕ ја обвини СДСМ дека за време на нивното владеење ја оддалечиле државата од демократските стандарди и ја приближиле кон, како што велат, недемократските модели на владеење.

Според партијата, политиките на СДСМ, предводена од Зоран Заев и Венко Филипче, наместо да ја приближат државата кон демократскиот свет, ја насочиле кон, како што наведуваат, модел сличен на владеењето во Русија и Белорусија.

— реклама —

„За нив политиката и водењето на државата не подразбираше владеење и спроведување мерки за општото добро, туку механизмот на власта го користеа за лично богатење“, се наведува во соопштението.

— реклама —

Од ВМРО-ДПМНЕ тврдат дека за време на владеењето на СДСМ биле отворени вратите за лица поврзани со, како што велат, структури блиски до руската политика, посочувајќи ги имињата на Олександр Онишченко и Борче Марковски.

Според партијата, едниот бил осуден во Украина на 15 години затвор за криминал и перење пари, додека другиот се соочува со постапка пред македонските правосудни органи.

— реклама —

„Во времето на власта на СДСМ само вакви криминални ликови успеваа, благодарение на политики кои не беа во интерес на Македонија и кои ѝ нанесоа сериозен удар и на национално и на меѓународно ниво“, велат од ВМРО-ДПМНЕ.

— реклама —

Оттаму додаваат дека со заминувањето на Заев и Филипче во опозиција завршила, како што велат, политиката на СДСМ за остварување на лукративни цели.

Од ВМРО-ДПМНЕ посочуваат дека нивната политика е насочена кон соработка со демократските партнери како Европската Унија, САД и Обединетото Кралство, со цел, како што наведуваат, зачувување на интегритетот на државата и националното достоинство.