Вистинска безбедносна драма се одвива во Грција, откако рибари во близина на островот Лефкада пронашле поморски дрон без екипаж, за кој медиумите тврдат дека бил натоварен со експлозив и детонатори.
Според грчките медиуми, дронот бил откриен во пештера во јужниот дел на островот, а моторот сè уште бил вклучен кога рибарите го забележале. Тие го извлекле до пристаништето Василики, по што бил предаден на грчките власти и на Министерство за одбрана на Грција.
Порталот „Прототема“ објави дека станува збор за украински поморски дрон од типот MAGURA V3 – беспилотно површинско возило што се користи за извидување, електронско војување и напади врз бродови. Според информациите, пловилото било опремено со сензори, антени и комуникациска опрема, а наводно носело и експлозив со три детонатори.
Грчките служби веќе ги отстраниле детонаторите и ги деактивирале батериите на дронот, додека истрагата продолжува.
Медиумите во Грција наведуваат дека властите разгледуваат повеќе можни сценарија за потеклото и намената на пловилото. Една од верзиите е дека можело да биде користено за шверц на дрога, додека друга насока на истрагата се однесува на можни операции поврзани со таканаречената „сенка флота“ на Русија, преку која се транспортира руска нафта заобиколувајќи ги западните санкции.
Во последните месеци беа регистрирани и други инциденти со напади врз руски бродови во Средоземјето и Црното Море, што дополнително ја засилува загриженоста кај безбедносните служби.
