Договор за откупната цена на ајварската пиперка е постигнат меѓу земјоделците, откупувачите и преработувачите, соопшти денеска од Струмица министерот за земјоделство, шумарство и водостопанство Борче Серафимовски.
Според договореното, од утре пиперката ќе се откупува по 40 денари за прва класа, 30 денари за прва-втора и индустриска класа, додека за најниската класа цената ќе изнесува 15 денари.
Серафимовски информираше дека договорот е постигнат по повеќедневни разговори со земјоделците, откупувачите и преработувачите, со вклученост и на Македонската асоцијација на преработувачи.
Тој ги повика откупувачите и преработувачите доследно да ги почитуваат договорените цени и правилно да ја класифицираат пиперката, а земјоделците навремено и правилно да го предаваат родот.
Министерот најави дека во октомври и ноември ќе продолжат разговорите со сите засегнати страни за воспоставување трајни решенија, вклучително и единствена методологија за класификација, прецизни рокови за исплата и поголема сигурност за земјоделците.
„Овие состојби не треба да се повторуваат секоја година. Потребни се законски и системски решенија со кои земјоделците ќе имаат сигурност во производството, откупот и исплатата“, истакна Серафимовски.
