СДСМ денеска преку соопштение упати серија критики кон премиерот Христијан Мицкоски, обвинувајќи го за, како што велат, спротивставени ставови и политики во однос на позициите што ги застапувал како лидер на опозицијата и оние што ги спроведува како претседател на Владата.
Во партиското соопштение, СДСМ ја пласира тезата за „двајца Мицкоски“, наведувајќи повеќе примери за кои сметаат дека претставуваат отстапување од претходните ветувања и политички ставови.
Од партијата посочуваат дека Мицкоски во минатото бил против Преспанскиот договор, а денес го оценува како значаен дипломатски успех, дека критикувал одредени евроинтеграциски процеси, додека сега зазема поинакви позиции, како и дека дел од ветувањата поврзани со реформите, инвестициите и јавните финансии не биле реализирани.
СДСМ преку соопштението упати критики и за економските политики на Владата, нивото на задолжување, инвестициите, како и за прашања поврзани со владеењето на правото и борбата против криминалот.
„Едниот лаже. Другиот ги правда лагите“, наведуваат од СДСМ, оценувајќи дека постои голем јаз меѓу политичките пораки што Мицкоски ги испраќал како опозициски лидер и потезите што ги презема како премиер.
