Потпретседателката на Филипините, Сара Дутерте, изјави дека организирала убиство на претседателот Фердинанд Маркос Јуниор, ако таа самата биде убиена, што ја натера канцеларијата на Маркос да вети „итна соодветна акција“.
Во драматична слика за продлабочувањето на јазот меѓу двете најмоќни политички семејства во оваа земја во Југоисточна Азија, Дутерте на прес-конференција рано наутро рече дека разговарала со атентаторот и му наложила да ги убие Маркос, неговата сопруга и претседателот на парламентот на Филипините, доколку таа самата била убиена.
„Разговарав со едно лице. Реков: „Ако ме убијат, одете убијте ги ББМ (Маркос), (првата дама) Лиза Аранета и (претседателот на парламентот) Мартин Ромуалдез“. Без шега. Без шега“, рече Дутерте на брифинг, кој беше полн со вулгарности.
„Реков: Не застанувај додека не ги убиеш, а потоа тој рече „да“.
Таа одговараше на онлајн-коментатор кој ја повика да остане безбедна, велејќи дека е на непријателска територија бидејќи вечерта била во долниот дом на Конгресот со шефот на нејзината канцеларија. Дутерте не кажа дека е под некаква закана.
Канцеларијата за претседателски комуникации одговори со соопштение во кое се вели: „Постапувајќи по јасната и недвосмислена изјава на потпретседателката дека таа ангажирала атентатор да го убие претседателот доколку успее наводниот заговор против неа, извршниот секретар ја проследи оваа активна закана до претседателската Безбедносна команда за итна соодветна акција“.
„Секоја закана по животот на претседателот мора секогаш да се сфати сериозно, особено што оваа закана беше јавно откриена на јасен и несомнен начин“, се вели во соопштението.
