Општина Центар и оваа учебна година ќе ангажира лични асистенти за ученици со посебни образовни потреби во рамки на проектот „Образование за сите“.
Согласно соопштението, на јавниот повик за работа може да се пријават лица со завршено средно образование, но предност при селекцијата ќе имаат кандидати кои поседуваат високо образование од областа на наставата, психологијата, педагогијата, дефектологијата или социјалната работа, како и оние кои имаат претходно искуство во работа со деца со попреченост.
Избраните кандидати ќе работат по 20 часа неделно и ќе добиваат месечен надоместок од 15.000 денари.
Градоначалникот Герасимовски истакна дека личните асистенти се клучни за успешен инклузивен образовен процес.
„Нашите асистенти им помагаат на учениците полесно да се адаптираат и функционираат во училишната средина. Тоа многу значи, не само за децата, туку и за родителите и наставниците, рече Герасимовски, кој истакна дека Општина Центар е единствената во Скопје која, и покрај сите предизвици, продолжува самостојно, од свој буџет, да го спроведува овој проект.
Оваа година имаше огромен интерес и од страна на образовните асистенти кои сакаат да бидат ангажирани во образовниот процес на децата со посебни потреби. Тие имаат едногодишни договори и се ангажирани на полно работно време за плата повисока од 37.000 денари.
