Пожарот што вчера изби во магацините на компанија за производство на текстил и во деловен објект во Нови Пазар е локализиран, но пожарникарските екипи и натаму остануваат на терен сѐ додека огнот целосно не биде изгаснат.
Началникот на Одделението за вонредни состојби во Нови Пазар, Дарко Белиќ, изјави дека гаснењето ќе продолжи до целосна ликвидација на пожарот, по што ќе следи увид за да се утврдат причините за неговото избувнување. Увидот, како што посочи, се очекува да биде извршен во текот на денот или најдоцна утре.
Тој објасни дека во магацините се наоѓале репроматеријали и тексас, кои поради својата структура бараат подолг и посложен процес на гаснење. Пожарнкарите, нагласи Белиќ, ќе останат присутни сѐ додека не исчезне и последниот пламен и трага од чад.
Во интервенцијата, покрај екипите од Нови Пазар, учествувале и пожарникари од Рашка, Тутин, Сјеница, Ивањица, Краљево, Крагуевац и Чачак, на кои им беше упатена благодарност за укажаната помош.
Пожарот изби околу 1:50 часот по полноќ, во ноќта меѓу петок и сабота, на улицата „Димитрије Туцовиќ“, при што биле зафатени повеќе поврзани објекти во индустриската зона. Според неофицијални информации, огнот зафатил повеќе од 2.500 квадратни метри магацински и производствени простории.
Повредени лица нема, а причините за пожарот ќе бидат познати по завршувањето на истрагата.
