Пожарот кај бачило Ќирилевец во НП „Маврово“ успешно изгаснат

Брзата реакција на Службата за заштита на природата при ЈУНП „Маврово“ спречи пожарот што вчера избувнал во близина на бачило Ќирилевец да се прошири кон едно од значајните живеалишта на дивата коза во Националниот парк „Маврово“.

— реклама —

Огнот бил навреме локализиран и целосно изгаснат, со што било спречено негово понатамошно ширење кон чувствителните природни подрачја.

— реклама —

Од Националниот парк информираат дека ова бил вториот пожар на нивната територија во текот на истиот ден. Оттаму посочуваат дека случајот е уште еден показател за зголемениот ризик од пожари во овој период и за значењето на постојаното присуство на терен и брзото дејствување.

Во гаснењето интервенирала Службата за заштита на природата, чиј состав секојдневно патролира и во тешко пристапни и планински предели со цел да се заштитат природните богатства на паркот.

— реклама —

Од НП „Маврово“ упатуваат благодарност до ренџерите за нивната посветеност, храброст и професионалност, а истовремено апелираат до сите посетители да бидат внимателни и одговорни.

„Еден невнимателен момент може да предизвика непроценлива штета“, предупредуваат од паркот, нагласувајќи дека Маврово е природно наследство што треба да се зачува и за идните генерации.