Завршува сезоната за спортски риболов во Националниот парк „Маврово“, забраната стапува на сила од 1 ноември

ЈУ Национален парк „Маврово“ ги известува сите спортски риболовци дека од 1 ноември 2026 година завршува сезоната за спортски риболов на сите води во рамките на Националниот парк.

— реклама —

Забраната за риболов ќе трае до 31 јануари 2027 година, а новата сезона ќе започне на 1 февруари 2027 година и ќе трае до 31 октомври 2027 година.

— реклама —

Од Националниот парк ги повикуваат сите спортски риболовци и посетители да ја почитуваат забраната и со одговорно однесување да придонесат за зачувување на рибниот фонд, заштита на водните екосистеми и одржување на природната рамнотежа.

Воедно, од установата упатија благодарност до риболовците за досегашната соработка, почитувањето на законските одредби и поседувањето уредна документација, риболовни дозволи, легитимации и соодветна опрема.

— реклама —

Посебна благодарност упатија за соработката за време на Светското крапско првенство, при што, како што наведуваат, риболовците покажале високо ниво на разбирање кон организаторите, партнерите и вработените во секторот за заштита на паркот.

Од ЈУ Национален парк „Маврово“ им се заблагодарија на сите риболовци и посетители за разбирањето и соработката, повикувајќи ги и понатаму да придонесуваат во зачувувањето на природните богатства на паркот.