Четири пожари на отворен простор се регистрирани во земјава до 13 часот денеска, од кои три се активни, а еден е ставен под контрола, информира Центарот за управување со кризи (ЦУК).
Активни пожари има на подрачјето на Штип, Виница и Дебар. Во штипското село Лесковица гори деградирана шума, ниски растенија и ниска вегетација, додека кај селото Пеклани во Општина Виница пожарот зафатил ниска вегетација.
Во Општина Дебар пожар е регистриран во правец кон граничниот премин со Албанија, каде што гори отпад.
Пожарот што зафаќа подрачје на Општините Македонски Брод и Сопиште е ставен под контрола. Станува збор за пожар кај селото Белица, на местото викано Кајорец, во Општина Македонски Брод, кој се проширил во правец кон Јасен, во Општина Сопиште. Зафатена е нискостеблеста и мешана шума.
Според ЦУК, до 13 часот нема регистрирани целосно изгаснати пожари на отворен простор.
Од Центарот за управување со кризи продолжуваат да ја следат состојбата со пожарите на терен.
