Пожарите не стивнуваат: три активни огништа, четири под контрола

Вкупно 31 пожар на отворен простор биле регистрирани во земјава во периодот од 25 до 26 август, до 7:30 часот, информира Центарот за управување со кризи. Од нив, три пожари се активни, четири се под контрола, а 24 се целосно изгаснати.

Активни се пожарите на подрачјето на општините Студеничани и Зелениково, каде огнот зафатил мешана шума на потегот од Моране, преку Вртекица и Рамни Габер, со крак кон Палиград, како и над Вражале.

— реклама —

Пожар е активен и на подрачјето меѓу општините Гостивар и Македонски Брод. Огнот се движи од селото Трново кон Битово и Заград, при што се зафатени нискостеблеста шума, ниска вегетација и папрат.

— реклама —

Третиот активен пожар е регистриран во општина Чашка, над селото Нежилово, во месноста Сватови, каде гори смрека.

Под контрола се четири пожари. Во општина Кичево гори високостеблеста букова шума кај селото Тајмиште, во месноста Дарда. Пожар има и меѓу резерватот „Јасен“ и селото Брезница во Македонски Брод, каде се зафатени ниска вегетација и борова шума.

— реклама —

Под контрола е и пожарот на градската депонија „Мелци“ во Кавадарци, како и пожарот на депонијата во Делчево.

— реклама —

Во текот на изминатото деноноќие се изгаснати уште 24 пожари, меѓу кои и пожари во шуми, стрништа, депонии и ниска вегетација во повеќе општини низ земјава.

Пожари биле регистрирани во Сарај, Гази Баба, Чучер-Сандево, Арачиново, Петровец, Илинден, Прилеп, Струмица, Кичево, Струга, Градско, Чашка, Виница, Делчево, Пробиштип, Куманово, Теарце и Гостивар.