Пожарите во Македонија не стивнуваат: Активни огнови во Студеничани, Македонски Брод, Велес и Јегуновце

Според информацијата од Центарот за управување со кризи, до 13 часот денеска на територијата на државата се регистрирани девет пожари на отворен простор, од кои четири се активни, три се под контрола, а два се целосно изгаснати.

— реклама —

Активни се пожарите во Општина Студеничани, каде огнот се движи на релација Моране – Вртекица – Рамни Габер и зафаќа мешана шума.

Активен пожар има и во Општина Македонски Брод, на местото Видуш, кај селата Драгов Дол и Локвица, каде гори ниска вегетација, нискостеблеста шума и грмушки.

— реклама —

Пожарот на територијата на Велес се проширил и кон Општина Зелениково. Огнот започнал кај селото С'лп, во местото Горно Село, а потоа се проширил кон селата Добрино и Тисовица. Зафатени се ниска вегетација, дабова и габерова шума.

— реклама —

Активен е и пожарот кој се шири од селата Копанце и Туденце во Општина Јегуновце кон селото Бојане во Општина Сарај. Гори мешана шума.

Под контрола се пожарите кај селата Алданци и Норово во Крушево, кај селото Конопница во Крива Паланка и на потегот Борино – Житоше во Крушево.

— реклама —

Во текот на денот изгаснати се два пожари – кај дивата депонија во селото Пагаруша во Студеничани и кај православните гробишта во Охрид, каде гореле дрва.