Пожарот што неколку дена беснееше на планината Жеден и навлезе во подрачјето над скопското село Бојане е ставен под целосна контрола, а според проценките на пожарникарите, околу 90 отсто од огнената стихија е изгасната.
На терен во текот на целиот ден интервенирале пожарникари од Тетово, кои се бореле со огнот во услови на високи температури и силен чад. Благодарение на нивната интервенција е спречено натамошно ширење на пожарот и е спасена шумата во близина на зафатеното подрачје, како и лозјата и овоштарниците под него.
Авни Амети, командир на Територијалната противпожарна единица Тетово, вели дека пожарникарите од утрото биле на терен и активно се бореле со огнот.
„Цел ден тука сме, од сабајле се бориме. Имаше многу чад, имаше многу јачина на пожарот. Кога се приближивме за да влеземе во тоа подрачје, влеговме и се бориме од сабајле до сега. Можам да кажам дека 90 отсто од пожарот е изгаснат“, изјави Амети.
Тој посочи дека пожарникарите успеале да ја заштитат шумата, а особено значајно било спречувањето на огнот да стигне до земјоделските насади.
„Фала Богу што ја спасивме оваа шума што е овде надолу“, рече Амети, заблагодарувајќи се и за опремата што ја добила Територијалната противпожарна единица Тетово, за која посочи дека им била од голема корист при интервенцијата.
Од подрачјето под пожарот се протегаат и голем број лозја и овоштарници, кои биле во опасност од огнот. Интервенцијата на пожарникарите спречила пожарот да предизвика поголема штета врз земјоделските површини.
Со ставањето на пожарот под контрола се очекува значително да се намали и чадот кој во изминатите денови се ширеше кон Скопје и се чувствуваше во повеќе делови од градот.
Амети воедно упати апел до граѓаните да бидат особено внимателни во периодот на високите температури и веднаш да пријавуваат доколку забележат пожар или палење на отворен простор.
„Имаме големи температури и треба да се пази на сè. Ако гледаат дека е палено нешто, да се јавуваат во противпожарните единици за да бидеме побрзи и да не настанува нешто поголемо“, порача тој.
Според Амети, пожарникарите се соочуваат со исклучително тежок период, со голем број интервенции секојдневно.
„Уморни сме. Со недели се бориме со огнот, секој ден. Имаме околу 12-13 пожари преку ден. Тоа е огромна бројка“, истакна командирот на Територијалната противпожарна единица Тетово.
