Заменик-директорот на ЈП „Национални шуми“, Кире Михаилов, предупредува дека пожарот на планината Китка, кој беснее веќе десетина дена, се соочува со сериозен проблем поради појавата на повеќе нови жаришта. Тој тврди дека станува збор за намерни потпалувања и го оцени случувањето како „тероризам“.
Според Михаилов, пожарот првично избувнал на територијата на Општина Студеничани, по што се проширил кон Општина Зелениково и зафатил тешко пристапни планински предели. Дополнително, пожарот што се движел од велешко Сл’п се приближувал кон ова подрачје, создавајќи широка фронтална линија.
Тој посочува дека во изминатите денови биле регистрирани повеќе нови жаришта долж линијата меѓу двата пожара. Михаилов тврди дека и откако пожарот во велешко бил целосно изгаснат, следниот ден бил направен обид повторно да се активира, но брзата реакција и координацијата на службите го спречиле неговото ширење.
Според него, истата вечер бил регистриран и нов пожар во правец над Градовци, во близина на постојното жариште, кој исто така бил локализиран од екипите на ЈП „Национални шуми“.
Михаилов наведува и дека на 20 август, во раните утрински часови, повторно избувнале неколку пожари во ШСЕ „Китка“, во оддел 17, на местото Попово Гумно. Поради непристапноста на теренот, огнот претставувал дополнителна опасност да се прошири кон селото Тисовица, каде што теренот е густ и тешко прооден. И ова жариште, како што посочува, било ставено под контрола со ангажман на екипите на терен.
Но, проблемите продолжиле. Михаилов тврди дека во петокот, меѓу 21 и 22 часот, биле регистрирани три нови пожари – првиот на патот од село Добрино, кај местото Маларека, вториот на патот меѓу Страхојадица и Тисовица, кај Бабин Дол, и третиот повторно на патот меѓу двете села, кај местото Грнчарица, во атарот на Градовци.
На трите нови жаришта до доцните ноќни часови интервенирале вработени од ПШС „Караџица“, екипи на Општина Зелениково, противпожарното возило на општината и ТППЕ Драчево.
„Тие постојано палат, а ние постојано и сè уште гасиме“, вели Михаилов, според кого зачестеното појавување на нови жаришта сериозно го отежнува справувањето со пожарот.
Тој предупредува дека по опасноста за Рамни Габер, во последниот период под сериозна закана е Палиград. Дополнителен проблем претставува и фактот што станува збор за планинско подрачје со повеќе населени места и приватни имоти, поради што движењето на граѓаните не може целосно да се ограничи.
Михаилов посочува дека во гаснењето секојдневно се ангажирани авиони, хеликоптери и екипи на терен, но дека постојаното појавување на нови жаришта го отежнува целосното локализирање на пожарот.
Тој апелира за итно преземање мерки за спречување на новите потпалувања и утврдување на одговорноста за оние кои евентуално намерно ги предизвикуваат пожарите.
